fbpx
الرئيسية / أوروبا / ازاي تتفسح في روما والفاتيكان بـ 80 يورو بس
بوابة السفر و السياحة في ايطاليا
بوابة السفر و السياحة في ايطاليا

ازاي تتفسح في روما والفاتيكان بـ 80 يورو بس

تجربة- عمرو شريف:

تصدق إنك مش محتاج أكتر من 80 يورو علشان تتفسح و تتبسط في روما والفاتيكان وتزور أشهر معالمهم.. أسرار الفسح في روما والفاتيكان في التقرير التالي:

  • أولا أستعد إنك تمشي كتير جدًا لأن روما عبارة عن متحف مفتوح, كل مكان فيه عبارة عن تحفة فنية سواء ميدان أو نافورة أو كنيسة أو متحف أو حتى مول.
  • أرخص وسيلة للتنقل من المطار إلى محطة تيرمني (المحطة المركزية في روما) هي الباص سعره 4 يورو, على شركة باصات Terravision (يعني كده رايح جاي 8 يورو).
  • نصيحة بخصوص روما، الأحسن متشتريش كارت روما باس (كارت بيخليك تدخل متاحف ببلاش)، بعد دراسة عميقة جدًا وقراءات كتير عن آراء الناس في الكارت في منتديات أجنبية زي TRIPADVISOR, قررت إني مشتريش الكارت لأنه مش هيفيدني قوي. وقررت حجز الأماكن السياحية أون لاين.
  • الكولسيوم والمنتدى الروماني: هتحجز الكولسيوم+ الميدان الروماني أون لاين وسعر التذكرة كانت 14 يورو فقط, و دي بقى يا حلو هترحمك من عناء الطوابير والزحمة, كل اللي عليك تطبع الورقة بتاع الحجز وتدخل بيها الكولسيوم بدون ما تقف في أي طابور (بس خلي بالك علشان التذكرة ليها وقت معين للدخول).
  • بعد الكولسيوم هتطلع تتمشى 5 دقايق حتلاقي نفسك أمام بوابة المنتدى الروماني (اللي فيه هضبة البلاتين) ودي الهضبة الأقدم من هضاب روما السبعة وتعتبر الهضبة دي مهد الأسطورة اللي بتحكي قصة إنشاء مدينة روما (وده مشمول في سعر تذكرة الكولسيوم).
  • الفاتيكان: وبرضه هتحجزها أون لاين من موقعهم الرسمي وسعر التذكرة 32 يورو ( مع المرشد ( قصدي مرشد سياحي محدش يفهمني غلط ?), خلونا نتوقف شويه عند الفاتيكان علشان ده قصة لوحده, أولًا أنصحك إنك تحجزه أون لاين طبعا ويكون الحجز مع مرشد سياحي وهقولك ليه.
  • السبب الأول: ده هيرحمك إنك تقف في طابور لا يقل عن ساعتين منتظر إنك تدخل الفاتيكان في طابور لا ينتهي.
  • السبب التاني: فيه معلومات رهيبه لازم تسمعها من مرشد محترف وده هيكون أحسن كتير من إنك مجرد تتفرج وخلاص, لأنك بجد هتتفرج على كنوز وثروات تاريخية.
  • السبب الثالث: إن ده هيرحمك من النصابين اللي واقفين على باب متحف الفاتيكان عاوزين يبعوا لك تذاكر الدخول بضعف ثمنها. وكمان هتقدر تدخل كنيسة سيستين بنفس التذكرة ودي تحفة فنية, وفي الكنيسة دي بيتم اختيار البابا الجديد. سقف الكنيسة لوحده إبهار وده رسمه الفنان مايكل أنجلو.
  • ملحوظة: خلال حجز متحف الفاتيكان بيتم تحديد وقت معين بالدقيقة وتقدر تدخل قبلها عادي, بس نصيحه إحجز بدري على قد ما تقدر, المتحف عادة بيفتح 9 الصبح, بس لحسن حظي علشان كنت حاجز مع مرشد فبدأت الرحلة 8 ونص الصبح, وده قبل المتحف ما يفتح بنص ساعة، و ده إدالنا ميزة إننا نتفرج على المتحف وهو فاضي مش زحمة نص ساعة قبل ما أي حد يدخل. ( توقع تلاقي المتحف زحمة جدا جدا في الصيف ? )
  • زيارة الفاتيكان لا تكتمل بدون زيارة كنيسة القديس بطرس, ودي بتعتبر مركز الكاثولكية في العالم, بعيدًا عن قدسية المكان, فالمكان بجد تحفة معمارية وفنية تستحق الزيارة, برنيني ومايكل أنجلو من أهم الفنانين اللي هتشوف أعمالهم داخل الكنيسة. (الخبر الحلو إن دخولها مجانا).

وبما إنك داخل متحف الفاتيكان تقدر تدخل من الباب الخلفي للكنيسة بدون ما تقف في أي طوابير تانية لأن الطوابير أمام الكنيسة بالساعات, كل اللي عليك إن بعد كنيسة سيستين هتلاقي بابين, اللي على الشمال يطلعك بره المتحف خالص ويخليك تمشي نص ساعة وتقف في طابور طويل علشان تدخل كنيسة القديس بطرس، أو تاخد المعلومة الحلوة دي مني و تدعي لي ☺ هتدخل من الباب اللي على اليمين، وده هيدخلك كنيسة القديس بطرس مباشرة وبدون أي طوابير ولا مشي (ممنوع التصوير داخل كنيسة سيستين).

  • لو زرت الفاتيكان يوم الأربعاء فدي هتكون فرصة علشان تشوف البابا, لأن كل يوم أربعاء من كل أسبوع البابا بيطلع في عربيته ويبارك المتواجدين في ساحة القديس بطرس.
  • بما إنك مصري متنساش تتصور أمام أكبر مسلة مصرية في العالم ودي موجوده في ساحة القديس بطرس أمام الكاتدرائية.
  • إيه رأيك تاخد جولة في روما تتفرج على أشهر معالم روما وهي: البانثيون (دخوله مجانا), السلالم الإسبانية, نافورة تريفي, منزل بربريني, مول جاليريا, بيت رئيس الوزراء, أعمدة ماركوس, معبد هادريان, مقبرة الملوك, مقبره رفائيل, وكنيسة سانت اجنتيوس. تصدق إن كل ده ببلاش وكمان مع مرشد سياحي بيشرح لك كل مكان فيهم بالتفصيل.

اتفضل ياسيدي الموقع ده هدية تدخل عليه وتحدد تاريخ الجولة والساعه كام, و مبروك كسبت جولة في روما مجانًا www.newromefreetour.com متنساش طبعا ذوقيا إنك تدفع بقشيش للمرشد في حدود 5 يورو?

  • معلومة ذهبية : جميع متاحف روما مجانًا أول كل أحد من كل شهر
  • في روما متشتريش مياه معدنية, لأن طول ما انت ماشي في الشارع هتلاقي حنفيات مياه عذبة تقدر تشرب منها ببلاش.
  • إيطاليا مشهورة بالشياكة ومصممين الأزياء العالميين, وعلشان تتفرج على أحدث خطوط الموضة في روما يبقى لازم تزور شارع كوندوتي وده فيه أرقى الماركات الإيطالية, طبعا كفاية تتفرج مش لازم تشتري يعني ?
  • لو بتحب الحدائق والمنتزهات متفوتش زيارة حدائق بورجيزي ودي كمان مجانا.
  • الهدايا التذكارية: إوعى تشتري من المحلات اللي أمام المعالم السياحيه المشهورة, هتلاقي محلات كتير وانت ماشي في الشارع بعيد عن المعالم المهمة وأسعارها أرخص كتير.
  • نصيحة إوعى تركب تاكسيات وخلي أغلب تنقلاتك بالمترو والباص ? . وفي تذكرة اسمها C.I.S ودي بتكون لمدة أسبوع سعرها 24 يورو, بس أغلب الناس بتشتري مدة أقل لمدة 3 أيام مثلا وبتكون بسعر 18 يورو, لكن الصراحة أنا كنت بشتري التذكرة الفردية ودي مدتها 100 دقيقة وسعرها 1,5 يورو لأني لقيتها أوفر لو مش هتركب مواصلات كتير.
  • ملحوظة حلوة للعائلات: الأطفال أقل من 10 سنوات مجانا في كل المواصلات العامة.
  • بخصوص الأكل مش هجيب سيرته ولا قولك تدفع كام علشان مش هخلص من الكومنتات 😀 , لكن أحب أفيد الناس اللي عاوزه تستفيد إن البيتزا المارجريتا أو الباستا من المطاعم العادية بتبدأ من 6 يورو والجيلاتو ( الآيس كريم الإيطالي ? ) بيبدأ من 2 يورو, وعيش مع نفسك.

 

خلينا بقى نراجع الحسابات بتاعتنا: 8 يورو انتقالات من وإلى المطار+ كولسيوم 14 يورو+ 32 يورو فاتيكان+ 5 يورو جولة سياحية+ 24 يورو مواصلات وانتقالات= 83 يورو.

شاهد أيضاً

افضل فنادق انترلاكن

افضل فنادق انترلاكن

افضل فنادق انترلاكن | الرحالة | مدينة انترلاكن في سويسرا، تقف الكلمات عاجزة عن وصف …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *