fbpx
الرئيسية / تقارير مميزة / إزاي تعرف المصري في مطارات العالم المختلفة: 23 طريقة
المطار
المطار

إزاي تعرف المصري في مطارات العالم المختلفة: 23 طريقة

تجربة- السيد مصطفى:

الرحالة | أول ما يوصل المطار بيكون محتار يسأل مين، رغم كل اليفط اللي ماليه المطار، لازم يسأل تلاتة على الأقل، وآخر واحد ممكن يسأله هو ظابط البوليس أو أي حد لابس رسمي اللي على البوابة، علشان عنده خبرة سيئة في التعامل معاهم في مصر، مع إنه ظابط البوليس موجود  لمساعدته.

مستحيل يتعامل مع لوحة الطيران، لازم يلف على كل شركات الطيران الأول ويسأل تلات أفراد مسافرين زيه.

الوحيد اللي يسألك انت سافرت قبل كده علشان يوثق معلومتك إذا كانت صح ولا غلط.

يعرف أو ميعرفش لما حد مصري تاني يسأله على أي حاجة فلازم يفتي، عمره ما يقول معرفش.

بتجيله صدمة لما يسأل حد سؤال والإجابة تكون معرفش، فكده أكيد أهل البلد عنصريين ومش بيحبوا المصريين أو المسلميين أو المسيحيين.

المطار

لما بيقف في الطابور علشان يوزن، ممكن جدا يسيب شنطه ويروح يبص علي طابور تاني أحسن يكون واقف في مكان غلط، موضوع التفجيرات والشنط المفخخة أو إنه يتعرض للسرقة مش موجود عنده.

بيقف في الطابور عينه مع اللي قدامه وودنه مع اللي وراه.

لو معاه خط دولي أو لسه معاه رصيد من البلد اللي مسافر منها فلازم يخلصه في الطابور بتاع الوزن، بيكلم الشارع كله.

لو حظك جه مع واحدة ست وعيالها قدامك فانت لازم دايما تقلها ان الطابور اتحرك وهي كمان لازم تتحرك، العيال خلفة عفريت بجد مش هزار.

شركة طيران

لو اثنين ستات ويتكلموا مع بعض ولسه متعرفين، فانت هتسمع أدق تفاصيل حياتهم لحد ما الطابور يخلص، وفي الوقت ده العيال بتقوم بدورها الطبيعي في اللعب بأي حاجة حتى الشنط بتاعتك وبيروحوا يزوروا كل طوابير شركات الطيران التانية، موضوع إن حد منهم يتخطف أو يمشي غلط مش وارد أصلا، مين اللي هيخطف التهمة دي.

أول ما تلاقي واحدة ست بتزعق لعيلة عندها 8 سنين وتقولها أخوكي فين يا بت أنا مش قلت لك خدي بالك منه، تعرف على طول إنها مصرية.

عمره ما يدخل حمام واقف قدامه عامل نظافة ابدا، مسكين ميعرفش ان مساء الخير وكل سنة وانت طيب دي في مصر بس، ممكن يلف المطار كله علشان يلاقي حمام من غير عامل نظافة.

بيركب الطيارة والمضيفة تبقي بتتحايل عليه علشان يعدل الكرسي ويسيب التليفون علشان الطيارة هتطير.

العيل اللي يعيط مصري من غير كلام علي الطيارة، علشان أمه بتحاول تسكته مش بتحاول تشوف هو عايز إيه، وأبوه بيلعب في تليفونه وعامل انه مشغول رغم ان مفيش شبكة في الجو أصلا.

الطيارة أول ما تلمس الأرض بيقوم يقف رغم إن الطيارة لسة بتتتحرك.

التكشيرة

 

في طابور الجوازات بيكشر علشان محدش يساله علي حاجة ويلبس وش أمين الشرطة.

ممكن جدا ياخد شنطه ويدخل علي الشباك علي طول بتاع الوزن ولا كأن فيه طابور.

لو اثنين ستات وبيتكلموا فأول حاجة هيبتدوا بالشكر في البلد ونظافتها وجمالها والسب واللعن في مصر وفي خلال خمس دقايق هتقلب قصيدة في حب الوطن وشتيمة في البلد اللي كانوا فيها، سبحان مغير الأحوال في ثواني من النقيض للنقيض.

يومك مهبب لو الطيارة مش مليانة قوي وفي كراسي فاضية، الجنسية الوحيدة اللي عايزة تمشيك من كرسيك علشان البيه عايز يمدد وينام علي تلات كراسي، وازاي تقوله لا، كدة انت هتتعامل معاملة صرصار البلاعة.

لو ملكش مزاج تحكي مثلا أو مش عايز ترغي مع الأستاذ، أول ما يسألك هو صلاة العصر الساعة كام، أعرف انه شاكك فيك انك مسيحي.

احنا وحشين

 

يا سلام بقى لما تكعبل كده في شلة أقباط مسافرين مع بعض ويبقوا مش عارفين يحددوا انت مسلم ولا مسيحي، هتعمل أحلى دماغ عليهم من أول ما يسألوك اسمك ايه وتقولهم إيهاب يوسف.

احنا كدة يا مصريين وحشيين مع بعض، الجملة دي هتسمعها لحد ما تكفر، وتبقي عايز تقوله يا عم أنا جيت جنبك اصلا، انا كل الي قلته ليك اسأل بتوع الاستعلامات مش بقولك نط من علي السطح.

ممكن يولع سيجارة في اي حتة ويطفيها في الارض عادي خالص ولا اي اندهاش

سيب مصر في مصر

 

مش عيب انك مسافرتش قبل كدة فلو مش عارف اسال ظابط او بتاع استعلامات او اي حد لابس رسمي، دا موجود اصلا لمساعدتك انت وغيرك. اي حاجة مكتوب ليها لوحة ارشادات مش بيضحكوا عليك امشي مع اللوحة حتكسب.

الطوابير بتخلص اسرع مع النظام وشوية صبر

لما تسافر سيب مصر في مصر

شاهد أيضاً

الرحالة ابن بطوطة

الرحالة ابن بطوطة : معلومات عن حياة ورحلات أهم رحالة عربي مغربي

الرحالة ابن بطوطة | الرحالة | يعتبر الرحالة ابن بطوطة من أبرز الشخصيات التاريخية التي …