الرئيسية / أوروبا / إزاي تسافر ميلان وفينيسيا بأقل من 300 دولار

إزاي تسافر ميلان وفينيسيا بأقل من 300 دولار

تجربة- بهاء فاروق:

تصدق إن فكرة إنك تسافر ميلان وفينيسيا بأقل من 300 دولار ? بجد وبحق وحقيقي, مش قلت لكم إحنا قد التحدي وهنسافر يعني هنسافر ولا هيهمنا دولار غالي ولا غيره ?.

إيه رأيك تقضي أسبوع بين ميلانو وفينيسيا بمبلغ أقل من 300 دولار. ركز معايا واقرا الكلمتين دول بتركيز ?

  • سعر تذكرة الطيران من شرم الشيخ إلى ميلانو، طيران مباشر سعرها 1310 جنيه مصري ذهاب و عوده على طيران Meridiana (الأسعار الواردة في هذا التقرير قبل تعويم الجنيه).
  • سعر الليلة في ميلانو في فندق اسمه hotel salus من موقع Airbnb بسعر 12 دولار في الليلة.
  • سعر الليلة في فينيسيا في هوستل II Lato Azzurro وبالإفطار كمان بسعر 22 دولار.
  • الانتقالات من ميلانو إلى فينسيا والعكس بالقطار هتكلفك 22 دولار.

يعني الرحلة دي كاملة طيران دولي وفنادق في فينيسيا وميلانو وانتقالات ما بين المدينيتن هتكلفك حوالي 285 دولار  ?

الجزء اللي فات كده كسبنا التحدي وعرفنا إزاي نقدر نسافر ميلانو وفينيسيا بمبلغ أقل من 300 دولار ? , كده حضرتك ممكن تقفل الموضوع وتشوف موضوع تاني, بس لو الموضوع يهمك فعلا وعاوز تعرف لو رحت هناك تتفسح فين إقرا الكلام اللي جاي ده علشان مهم جدا  😎

ميلان: ليها سحر ورونق خاص, هتحسهم أول ما توصل لساحة الدومو الشهيرة وتشوف كنيسة الدومو اللي بتعد من أكبر الكنائس في العالم, وانت ماشي بين شوارعها وحواريها هتشوف مجموعة من أهم وأجمل المعالم السياحية واللي أغلبها دخولها مجانا على فكرة. طيب إيه أهم معالم روما:

الدومو بيازا: و دي وأشهر ساحة في ميلان, وهتلاقي فيها مطاعم وكافيهات كتير, وبتحتضن كنيسة الدومو واللي بتعد أهم معلم سياحي في ميلان, وعلشان تطلع الكنيسة من فوق وتشوف أجمل منظر لميلان ده هيكلفك تقريبا 7 دولار لو طلعت على السلالم, و11 دولار لو أخدت الأسانسير.

مركز Galleria Vittorio: وده اتبنى في القرن الـ 18 ويعد من أجمل مباني ميلان, ويكفيك فخرًا إنك تتمشى فيه وتتفرج على أشهر دور الأزياء العالمية زي برادا وأرماني وجوتشي ولوي فيتون, وطبعا دخول مكان زي ده مش هيكلفك ولا مليم.

بورتا سيمبيون: وده يعتبر مركز المدينة وبيسمى قوس النصر, والغريب إني شفت قوس نصر زي ده في أغلب العواصم الأوروبية زي برشلونة وباريس كمان. وانت هناك متنساش تعدي على حديقة باركو سيمبيون ودي من أجمل حدائق ميلان وكل ده طبعا ببلاش.

كنيسة سانتا ماريا ديلي غراتسيا: وطبعا أشهر حاجة في الكنيسة دي لوحة العشاء الأخير لليوناردو دافينتشي، ودي دخولها ممكن يكلفك 8 دولار.

نافيليو جراندي: لو عاوز تعيش الأجواء الفينيسية وانت في ميلان تقدر تزور المكان ده وتستمتع بوجبة إيطالية على ضفاف القنوات المائية, وكأنك في فينيسيا.

لا سكالا: لمحبين الأوبرا والموسيقى متفوتوش زيارة المكان ده لأنه يعتبر من أشهر دور الأوبرا في العالم , يمكن يكون حظك حلو ويكون بيستضيف واحد من كبار النجوم العالميين في الأوبرا

دي أهم معالم ميلان, لكن الميزة بقى وانت في ميلان تقدر تزور مدن جنبها بكل سهولة أما عن طريق القطار أو الباص وأغلب الأماكن دي تبعد عن ميلان من نص ساعة إلى ساعة زي بحيرة كومو أو مدينة بافيا أو بريسيا أو كريمونا لكن أنا اخترت لكم المدينة الأشهر في إيطاليا لأصحاب المزاج العالي (فينيسيا).

فينيسيا:

لازم تزور كاتدرائية وساحة سان ماركو: وده المكان الأساسي للتجمع وهتلاقي فيه كافيهات ومطاعم ومتاحف كتير تستحق الزيارة ومنهم متحف دوكالي.

– يا سعدك يا هناك لو حضرت الكرنفال في فينسيا  ? , من ساحة سان ماركو إلى ساحة سان باولو هتشوف الملابس التنكرية والأقنعة  ? والاحتفالات وعروض مختلفة في مشهد ممتع مش هتشوفه في أي مكان تاني في العالم.

– سمعت عن الزجاج الملون المورانو Murano تعرف إن ده اسم جزيرة في فينيسيا اشتهرت بأعمال الزجاج واتسمى الزجاج المورانو على اسمها, لو انت في فينسيا متفوتش زيارة الجزيرة دي.

شاهد أيضاً

أجمل المدن السياحية في تايلاند

أجمل المدن السياحية في تايلاند : بينهم بانكوك وبتايا وشانجماي

أجمل المدن السياحية في تايلاند | الرحالة | رحلة- بهاء فاروق:   بداية عشقي للسفر …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *