الرحالة و المسافرون العرب

أسرار السفر لماليزيا: الانتقالات في بينانج ولانكاوي

تجربة- بهاء فاروق:
مهم جدا تعرف ازاي هتتنقل ما بين الجزر وداخل الجزر علشان تعرف تنظم رحلتك كويس لماليزيا.
أسرار الانتقالات داخل ماليزيا:
• المسافة من مطار كوالالامبور الدولي إلى داخل العاصمة كوالالامبور حوالي 50 دقيقة بالسيارة، وسعر السيارة حوالي 80 رنجت. السر الأول: لو كنتوا فردين أو 3 أفراد حتركب تاكسي اسمه Budget Taxi وهتلاقي الكاونتر بتاعه داخل المطار قبل بوابة الخروج. لو انت لوحدك الأوفر انك تركب المترو واسمه KLIA EXPRESS و سعره للفرد 35 رنجت وبيروح إلى KL SENTRAL خلال 23 دقيقة فقط.

السفر لماليزيا
السفر لماليزيا

• لو هتوصل مطار كوالالامبور الصبح سافر بعد الوصول مباشرة إلى لانكاوي أو بينانج (حسب ما هتقرر) وده هيوفر معاك ثمن الانتقالات من وإلى داخل كوالالامبور نفسها، وهتكسب وقت ومش هتضيع يوم تاني في السفر. نصيحة خلي على الأقل 3 ساعات بين وقت وصول الرحلة الدولية وإقلاع الرحلة الداخلية.
• كوالالامبور فيها مطارين: المطار الدولي وفيه صالتين KLIA1 & KLIA2, صالة 1 لشركات الطيران الدولية الكبرى زي طيران الماليزية مثلا، وصالة 2 للشركات منخفضة التكاليف زي إير إيشا وتقدر تتنقل ما بينهم من خلال مترو في 60 ثانيه وسعره 2 رنجت, و فيه أيضا في كوالالامبور مطار أصغر اسمه SUBANG وده الأقرب إلى العاصمة كوالالامبور ولكن ده مخصص للرحلات الداخليه فقط. معلومة مهمة: خلي بالك وانت بتحجز رحلات الطيران الداخلي انت هتسافر وهتوصل على أي مطار فيهم.
• السفر من كوالالامبور إلى الجزر: في طريقتين: الأولى: عن طريق الباص إلى جزيرة بينانج فقط ومفيش باص إلى لانكاوي, وده طريقه مسلي بس طويل ومتعب جدا وممل وهتضيع يوم كامل في الطريق ولا أنصح بيه. الطريقة التانية: الطيران الداخلي وده أسرع طبعا وبيروح من كوالالامبور إلى بينانج أو لانكاوي في حوالي ساعة فقط وسعره رخيص مش غالي.

• لانكاوي: جزيرة صغيرة تصلح أكثر لشهر العسل لأن أجوائها رومانسية, وفيها منطقتين مهمين للسكن: منطقة كواه ودي تعتبر العاصمة فيها مول واحد صغير وكام مطعم والبحر فيها مش حلو قوي للنزول, بس فيها حديقة لاجيندا ونصب النسر والينابيع الساخنة air Hangat, والمنطقة التانية هي سينانج بيتش ودي البحر فيها أحلى وفيها مطاعم وبارات صغيرة على البحر فتعتبر مسلية أكثر بالليل لزوجين, التنقل داخل لانكاوي بالتاكسي فقط لأنها جزيرة صغيرة.
قبل ما تطلع من المطار احجز الرحلات والانتقالات وكل شيء من المكاتب السياحية اللي جوه المطار, ولو عاوز تدرس الموضوع كويس خد كل الفلايرز (عروض الرحلات من كل المكاتب) وادرسهم في الفندق براحتك وبعدين ممكن تكلمهم وتحجز معاهم كل حاجة, نصيحة: لوهتحجز كل الرحلات من مكتب واحد فاصل معاه وممكن يديلك الانتقالات من و إلى المطار مجانا لو حجزت أكثر من رحلة , أو على الأقل هيعملك تخفيض كويس على الانتقالات.
متتعاملش مع أي مكتب فيه عرب لأن للأسف استغلالين جدا وأسعارهم أغلى من أي حد ويستغلوا العرب لأقصى درجة بحجة إننا مش هنعرف نتعامل مع حد تاني (بس على مين هههههه, نحن هنا 🙂 ), معلومة أخرى: جزيرة لانكاوي منطقة حرة معفاة من الضرائب فأسعار المنتجات المستوردة زي الشوكلاتات ومنتجات أخرى أرخص بكثير من كوالالامبور.


• جزيرة بينيج: فيها منطقتين مهمين للسكن: منطقة باتو فرنجي ودي على البحر وكلها فنادق فخمة ومنتجعات وفيها فنادق برضه رخيصة وفيها سوق ليلي بليل حلو ومسلي ومطاعم والبحر فيها حلو ويصلح للنزول, المنطقة الثانية اسمها جورج تاون ودي تعتبر عاصمة بينانج والفنادق فيها أرخص من باتو فرنجي ولكن البحر فيها مش حلو قوي وفيها مولات زي كومتار وسهرات ومطاعم كتير متعدده ومعالم الاستعمار البريطاني على الجزيرة.
في الانتقالات داخل بينانج اعتمد على الباص فهو أرخص كثير من التاكسي وبيروح كل مكان وسعر التذكرة 2 رنجت, معلومة ذهبية: فيه باص مجاني داخل منطقة جورج تاون بيلف كل المنطقة بدون ما تدفع ولا مليم، فرصة حلوة تتفرج على العاصمة ببلاش 🙂


• الانتقال بين الجزيرتين: فيه طريقتين: الأولي هي العبارة السريعة ودي بتوصل في حوالي ساعتين ومنصحش بيها لأن البحر ساعات بيكون عالي وبتكون رحلة متعبة جدا بالذات لو فيه أطفال والصراحة بهدلة لو معاك شنط, الطريقة التانية وهي الطيران ودي أحسن وسيلة ورخيصه جدا للتنقل بين الجزيرتين وبتوصل في 35 دقيقة.

 

اترك رد

لن يتم نشر عنوان بريدك الإلكتروني.