الرئيسية / أوروبا / أحمد رضا يكتب رحلته إلى سويسرا: أغلى بلد في العالم

أحمد رضا يكتب رحلته إلى سويسرا: أغلى بلد في العالم

رحلة- أحمد رضا:

بما إني ملاقتش حد كاتب عنها, فقولت أما أحكي لكم عن أغلى بلد في أوروبا 😀 سويسرا من أجمل البلاد اللي شوفتها, مش بس جمال طبيعة، جمال المدن والناس والحكومة والبنية التحتية وكل حاجة. أنا قضيت فيها كذا شهر, فإليكم بعض المعلومات عنها:

 

* مميزاتها كبلد حضارية :

– مفيش حد مبيتكلمش إنجليزي حتى لو كان عيل صغير.

– كل بلادها نضيفة جدا جدا جدا شوارع وحدائق ومنتزهات وأماكن عامة.. إلخ

– أنظمة المواصلات هناك تحفة القطارات والـ Subway والـ Tram والتاكسيات وكل حاجة هناك تحفة, مش بس إنها جميلة كمان منظمة جدا في مواعيدها بالثانية, وليها تطبيقات كتير ممكن تحجز من عليها من مكانك وبتوريك كذا طريق ممكن تروح بيه وهتمشي قد إيه والرحلة هتاخد وقت قد إيه, زي اليابان كده.

– في Lane للعجل في كل طرق سويسرا سواء داخلية أو طرق سريعة, وفي منفاخ هواء وعدة لحام في كل حي في البلد وممكن تعرفهم من Google MAps

– الشيكولاتات السويسرية 😀

– في سويسرا بيتكلموا كذا لغة:

Swiss German  مش زي الألماني العادي, الألمان صعب جدا يفهموا لغتهم.

French  ودي للسكان القريبين من فرنسا

Italian  ودي لسكان الجنوب

Romansh  نسبة لا تحصى بيتكلموا اللغة دي

– البلد أمان جدا جدا, الشرطة في كل حتة ومبيفرقوش بين أي حد, ويوم الجمعة والسبت والأحد بينتشروا جدا جدا بالليل عشان يأمنوا الناس, مش زي بلاد كتير في أوروبا وتلاقي الناس سكرانة وخناقات وكده.

– النت Free في أي مكان عام.

* مميزاتها كبلد سياحية:

– الأماكن الطبيعية فيها تجنن, سواء صيف أو شتا وإليكم بعض الأماكن الساحرة:

Interlaken :

من أشهر Tourism attractions في سويسرا و95% من السياح من دول الخليج العربي, آه والله هتلاقوا الشوارع كلها الناس لابسه جلابيات وعبايات ونقاب لدرجة إن مفيش سويسريين غير البياعين, ودي المدينة الوحيدة اللي هتلاقوا كل حاجه تحتها ترجمة بالعربي.

 

Swiss national Park :

مش هقول عنها غير إن يكفيك تبص على صورها ع جوجل

 

Geneva :

جينيفا عبارة عن مزيج بين التاريخ والحضارة, بلد عريقة. ممكن أشبهها بـ Paris بس أنضف كتير جدا وأكثر نظاما

 

Zurich :

دي أكتر بلد منظمة جدا شوفتها في حياتي. مفيهاش مناطق سياحية كتير, ممكن تخلصها في يوم واحد

Pilatus , Lucerne

بلد للاستجمام, ممكن تروحها يوم واحد وتعمل Hiking في غابة حقيقية.

 

Basel :

عجبني فيها المناطق الخضرا والملعب بتاع Basel , ومتاخدش أكتر من يوم

 

– في جبال كتير حلوة للـ Camping m Hiking في الـ ALPS غرب سويسرا.

 

* عيوبها بقى 😀 😀 تكمن في جملة واحدة: أغلى بلد في أوروبا, ولو حد قالك النمسا أغلى يبقى غلطان، أغلى مستوى معيشة حيث أن اقل مرتب هناك 4000 فرنك يعني حوالي 3800 يورو. يكفي إني أقول إن الـ Big mac اللي في أي بلد في أوروبا بـ 6 – 8 يورو, في زيوريخ بـ 13 😀 😀

– أرخص Hostel في زيوريخ مثلا بـ 50 فرنك يعني حوالي 46 يورو في الليلة

– لو انت مصري, للأسف فيزا السياحة رخمة جدا لأن اللي في مصر رخمين قوي

– عشان تعمل Hiking في بلد زي Lucerne هتكلفك حوالي 50 يورو عشان تطلع أو تنزل بـ cable car ولو هتطلع وتنزل بيهم يعني 100 يورو في cable car بس 😀

أسبوع واحد في سويسرا كفيل انك تلف 4 أو 5 دول تانية وتحوش كمان 😀

ملخص الكلام في سؤال, هل سويسرا كبلد تستاهل ان الواحد يدفع كل دا ويروحها؟

الإجابة: لو بتحب الرفاهية, آه روح. لو انت Solo traveller وواخدها ضمن كذا بلد صدقني هتتخيط فلوس 😀

شاهد أيضاً

السفر التطوعي إلى تايلند

السفر التطوعي إلى تايلند : تجربة فرات سامي في التطوع بمزرعة تايلاندية

السفر التطوعي إلى تايلند | الرحالة | رحلة- فرات سامي:   ابتديت يومي الرابع في …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *