fbpx
الرئيسية / آسيا / أحمد أسامة يكتب رحلته إلى فيتنام: زرها ولن تندم

أحمد أسامة يكتب رحلته إلى فيتنام: زرها ولن تندم

رحلة- أحمد أسامة:
علشان في ناس كتير بتسأل ازاي تسافر فيتنام، فالموضوع ده كله في خلاصة ازاي تسافر لهناك، الأول فيتنام بلد سياحية من الدرجة الأولى، فيها كمية سياح كتير جدًا، لكن مفيش سياحة عربية هناك، وتكاد تكون منعدمة، الدولة مهتمة بالسياحة جدا ومسهلة لهم حاجات كتير قوي مع إنهم مش دولة غنية ولا متقدمة.
فيتنام دولة صغيرة في المساحة ولكن طولها أكتر من حوالي 2000 كيلومتر، هي قريبة من الحدود مع تايلاند وكمبوديا وقريبة من هونج كونج.
من الآخر صعب إنك تقرر تسافر سفرية واحده من مصر لفيتنام بس, لكن لو انت رايح تايلاند فلازم تحجز وتروح تقضي يوميين هناك، لأنك فعلا مش هتندم. أو لو في هونج كونج تقدر تحجز من هناك، التذكرة رايح جاي أرخص من القاهره لشرم الشيخ.


• الفيزا
أغلب دول العالم بتحتاج فيزا عشان تدخل فيتنام، ماعدا حوالي 10 جنسيات أوروبية, نظام الفيزا سهل جدا Evisa. بتدخل علي الموقع ده
https://visaforvietnam.vn/apply-vietnam-visa.html
بتختار نوع الفيزا اللي انت محتاجه واللي هي سياحة والفترة اللي انت محتاجها إذا كان شهر ولا 3 ولا 6 لحد سنة وهل عايز الفيزا single entry ولا Multi entry بتختار كمان كذا أوبشن عايز الفيزا تجيلك إمتى، فيزا عادية في 48 ساعة ولا في 24 ولا في 4 ساعات ولا حتي في ساعة، بعد ما تختار بيطلع لك السعر المطلوب.
فيزا سياحة single شهر واحد عادية تستلمها بعد يومن بتكون بحوالي 15$ بتدفعهم بالفيزا وبتدخل إيميلك واسمك وتاريخ ميلادك وقم الباسبور.
بعد 48 ساعة بالظبط بيجيلك إيميل فيه جواب مختوم مكتوب فيه أسماء كل الناس اللي قدمت في اليوم ده ومعاه كمان أبليكاشن وبيطلبوا منك تطبع الجواب ومش لازم ألوان وتجيب صورة معاك وتملا الأبليكاش اسمك وعنوانك ومين اللي معاك وبتقدمهم مع بعض لما توصل المطار.


• اختيارك للمدينة
في مدينتين أساسيتين هناك، واحدة هي Hanoi العاصمة، دي مدينة ومتاحف وبحيرات ومعابد وكده، وفي نا دانج ودي علي بحر الصين وشواطئ شوف انت بتحب إيه أكتر وروح.
• نبذة عن البلد
فيتنام كلها تقريبا بوذيين في حوالي 10% اقليات مابين هندوس و مسيحين ومسلمين, حتي بوذا اللي في هانوي غير بوذا الدهبي بتاع تايلاند وماليزيا ده بوذا تاني لونه أسمر، في الجنوب بوذا الطبيعي اللي في تايلاند.
اليومين اللي قعدتهم هناك ماشفتش أي حد مسلم خالص ولا واحدة محجبة لا فيتنامية ولا حتى رايحة سياحة، كل السياحة من أمريكا وكندا وأوروبا وأستراليا.
البلد في المجمل كلها أجانب فعلا في الشارع فكون إن انت أجنبي دي مش هيخليك غريب، بالعكس الناس ظريفة ومتعاونة جدا، كمان في نسبة كبيرة منهم بيتكلموا لإنجليزي كويس ونسبة أقل بتتكلم بالفرنساوي بس طبعا اللغة الأساسية الفيتنامية، ودي حتي بتتكتب بحروف غير اللي موجودة.
مصر اسمها بالفيتنامي (آي كــاب) فلما حد يقولك انت من فين قوله آي كاب عشان حتى لو الناس بتعرف إنجليزي كويس مش شرط يكون عارف أسامي البلدان كلها. وعلى العموم اللي فهمته من الناس إن هما عندهم فيلم أو مسلسل بيحكي عن الفراعنة اليومين دول فكل الناس عارفة عن مصر.
برضة الراجل بتاع الجوازات قالي إن مفيش ناس كتير بتيجي من هناك عندنا.
• الطيران
في هناك طيران علي الخطوط القطرية والإماراتية لهانوي. أنا استخدمت من هونج كونج شركة Hongkong Airlines وهي من أسوء الشركات وأغباها. في كمان فيتنام إير لاينز شكلها حلو جدا وفي airjet ودي أقل واحدة.
HongKong Airlines فيها مشكلة إن انت بتحجز في العادي باسمك زي أي شركة First Name & last Name وبما إن مفيش عرب تقريبا بيركبوا هناك كتير فبالتالي كنت أنا بالنسبة لهم حاجة نادرة عشان اسمي في الباسبور اسم رباعي وقالك كده الحجز غلط لازم اسمك علي التذكرة يكون زي الباسبور مفروض تدفع فلوس لتغيير التذكرة. الموضوع اتكرر في الذهاب والعودة ومدفعتش حاجة بس بعد خناقات كتير.
فالأظرف والأضمن إنك تبعتك لخدمة العملاء أول ما تشتري التذكرة بخصوص الاسم عشان ماتلبسش.
• فيزا المطار
قدام الجوازات بتروح تشتري الفيزا بتقدم الأبلكيشن الباسبور الصورة والجواب اللي جالك بتدفع 25$ ممكن مايوازيهم بالفيتنامي أو أي عمله تانية أكيد مش جنيه، 5 دقايق بتكون الفيزا اتطبعت واتلزقت علي الباسبور وتعدي من الجوازات.
• المطار
المطار مش كبير قوي بس رائع أول ماتطلع هتلاقي tourist help هناك بتقوله عنوان الفندق بيقولك التاكسي هيكون في حدود كذا 20 $ أو في أتوبيس بيكون بحوالي 1.5$ الأتوبيس حلو جدا وفي free Wifi ونضيف وكل الناس قاعدة المطار بعيد عن وسط البلد حوالي نص ساعة.


• المواصلات
بعد ما تطلع برة المطار التاكسي هناك رخيص جدا, كمان في أوبر وهو رخيص جدا بس يفضل تطلبه مع حد جنبك يكون عشان يعرف يتكلم مع السواق وهو برضة رخيض ومفهوش نصب. بعض التاكسيات العداد بتاعها بيكون بيدي سعر مش حقيقي.
الكلام ده لو انت مع العيلة إنما بقى لو انت لوحدك في أوبر موتوسيكل وفي موتوسيكلات كتير اتكل علي الله واركب وراه الدنيا هتكون جميلة وأرخص بكتير.
في كمان وسيلة مواصلات غريبة قوي كده كرسي أحمر متنجد قطيفة بستارة حمرا وبتقعد عليه ووراه واحد بعجلة بيفضل يبدل بيك ويوصلك هو بغض النظر إن الراجل بيكون كبير في السن جدا وإنه مش عارف بيجب قوة منين إنه يبدل بصراحة بس هو إحساس غريب ماتعرف انت بتكون رايح مشوار ولا رايح تتطاهر علي الكرسي الأحمر القطيفة ده، بس هي حاجة سياحية.


• العملة
العملة اسمه دونج والدولار الواحد بيساوي 22500 دونج وطبعا العملة شكلها حلو جدا ومرسوم عليها صورة الزعيم الأسطوي هو تشي منه.
• هانوي العاصمة
شوف هي مدينة شبه مصر كده طبعا مفيش أي احترام للمرور ولا الإشارات والمرشد قال للناس هاتلاقوا صعوبة إنكم تعدوا الشارع بس أنا طبعا بالنسبة لي كانت زي الحلاوة كأنك في مصر بالظبط.
هانوي مشهور بالبحيرات فيها أكتر من 100 بحيرة فيها معابد بوذية كتيرة جدا وفي حاجات كتير قوي تقدر تعملها أشهرها لإنك تقضي يوم كام برحلة في بحيرة في هانوي وتتغذا هناك وكمان تزور كل المعابد والمتاحف اللي هناك وطبعا القصر الرئاسي وقبر هو تشي منه.
طبعا الشارع مليان صرافات لتبديل الدولار وكمان شركات سياحة تقدر تحجز معاها وهتكون بسعر أقل كتير من لما تحجزه في الفندق.
• هو تشي منه
البلد كلها بتتمحور حول الزعيم ده هو اللي حارب الفرنسيين وبيحبوه جدا، مدفون في مكان وجسمه متحنط والناس لحد دلوقتي بتروح تزوره، أكبر مدينة فالجنوب متسميه باسمه، راجل مناضل وليه شهره عالمية كل العملات عليها صورته هو وبس.
• الأكل
طبعا ده مشكلة كبيرة جدا نظرا ان مفيش مسلمين ولا في عرب بيروحوا فلا تلاقي زي أغلب آسيا مطاعم كاتبه حلال ولا هتلاقي مطاعم عربية خالص، الحل إيه بقي ياريس إن في بعض البوذيين نباتيين فحضرتك هتقولهم أنا نباتي وتقضيها باذنجان بالصلصة وشوية حاجات عجيبة كده بس يعني بتفي بالغرض.
• نظام المعيشة في البلد
زي ماقلتلك في سياح كتير جدا والبلد بتسهر فحضرتك تمشي على أي بحيرة هتلاقي المعابد مفتوحة الدنيا زحمة جدا بياعيين في كل مكان فرق بتعزف موسيقي ناس بترقص رقص فلكلوري كده هتتمشي وهتتبسط وبيفضلوا كده لحد بليل يمكن للساعة 1 كمان مطاعم وكافيهات وطبعا مكاتب tourist Help.

 

شاهد أيضاً

رحلتي الى جزيرة بوكيت

رحلتي الى جزيرة بوكيت : تجربة فتاة مصرية عمرها 19 عامًا

رحلتي الى جزيرة بوكيت | الرحالة | رحلة- بسمة محمود:   أنا بسمة 19 سنة، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *