أحمد إبراهيم يكتب رحلته إلى جويلين: الصين بلد جميل

أحمد إبراهيم يكتب رحلته إلى جويلين: الصين بلد جميل

Icon فبراير 17, 2017
Icon By Ahmed Belal
Icon 0 comments

رحلة- أحمد إبراهيم:

الصين حلوة😃 بما ان ناس كتير بقت تسأل عن الصين فأنا قولت أحفز الناس شويه.. لهواة السفر أو المغامرة أو الطبيعة أو للناس اللي بتحب تروح أماكن غير مشهورة ومحروقة من السياح المملين، عليك وعلى الصين😃

 

خلونا نتكلم عن جويلين  Guilinالعواصم الأروبية والمدن الكبيرة حول العالم كوم والبلاد جوه الصين كوم تاني، بمعنى إن البلاد الكبيرة هتلاقي لها ألف دليل على النت وخرايط ومساعدات وناس كتير بتتكلم إنجليزي، وشبه مستحيل انك تتوه ولو تهت مش هتبقى بعدت كتير لكن تعالى لحد هنا واعمل كده😃 

بداية محدش بيتكلم إنجليزي ولا في حاجة مكتوبة بالإنجليزي وخرايط جوجل وhere maps مش شغالين و Apple maps مش بتستجيب في كل المناطق، الحاجات اللي بتشتغل حاجات صيني ف وجودها زي عدمه، ف أكيد مكان زي كده مش للناس اللي قلبها خفيف، أنا برضه مبتكلمش صيني لكن استخدمت الذكاء الحدسي عشان اتشقلب في الأجواء 😃

جويلين هي عبارة عن مدينة كبيرة جدًا عاصمة اقليم جوانجي Guangxi والأماكن الطبيعية اللي فيها على مساحات كبيرة ومحتاجة مواصلات للانتقال بينهم، لكن أكبر مكان متجمع فيه مزارات وأنشطة تتعمل وكده موجود في مدينة يانجشو Yangshuo والمناطق اللي حواليها لكن غالبا مضطر تركب أي حاجة تاني عشان تشوف حواليها، يانجشو هي الصورة اللي مطبوعة على ورقة العشرين يوان للي شاف اليوان قبل كدا 😀

بداية حجزت غرفة في بيت قديم (أثري يعني) مع أسرة صينية في قرية قريبة من يانجشو اسمها بايشاجين Baishazhen من ويب سايت  Airbnb، وطبعا سألت صحاب البيت اللي هقعد فيه على الطريق وقالوا لي الأوبشنز اللي موجودة وادولي العنوان بالصيني وأنا نزلت الخرايط أوف لاين من وأنا في هونج كونج عشان أبقى متابع.

ركبت قطر سريع من جوانزو خد ساعتين لحد محطة قطر جويلين الشمالية والمفروض آخد مواصلة لمحطة جويلين في الجنوب وبعدين آخد الباص اللي بيروح يانجشو، طبعا في سواقين كتير جدا عرضوا علي يوصلوني ليانجشو على طول لكن أنا رفضت لطول المسافة ولأن جرت العادة في الصين انهم بيستغفلوا الأجانب 😀 خصوصا لما قالوا لي انهم مش عايزين يتفقوا على رقم ثابت وهيسيبوا العداد هو اللي  يحسب لكن عيب علىك يازميلي المسافة على الخريطة كبيرة وشكلها سفرية أساسا ف مينفعش غير أتوبيس حتى اللي كان بيتفق فيهم على رقم كان بيقولي ٤٠٠ يوان وحاجات كدا، في الآخر يعني قفشت تاكسي وداني لمحطة الجنوب بـ٢٠ يوان وركبت أتوبيس من هناك بـ٢٠ يوان لحد القرية اللي نزلت فيها والناس بتوع البيت كانوا مستنييني ووصلوني لبيتهم وعزموني على الغدا كمان 😀

لما بصيت على الخريطة لقيت فعلا كل حاجة بعيدة ف استأذنتهم أأجر منهم الموتسيكل بتاعهم وخدته فولته جاز بـ٢٥ يوان وقعد معايا تلات أيام فحت وردم وكانت فسحة لطيفة مكنتش فاهم أنا رايح فين ولا جاي منين بس كنت مستمتع جدا خصوصا إن المكان كان وهمي 😀

بالنسبة للأكل كان غالي في المطاعم لكن الناس اللي كنت قاعد عندهم كانوا بيقدموا فطار ببلاش وبيسألوني كمان أحب أفطر ايه عشان يحضروه 😀 بالنسبة للغدا كنت بشتري أكل من الشارع أكله على الواقف  خصوصا إن أنا من هواة أكل الشارع في الصين، وكان بيتكلف من ١٥ لـ٢٠ يوان تقريبا، والعشا كنت ببعت للناس اللي قاعد عندهم قبل ما أرجع البيت وكانوا بيحضرولي العشا وأحاسبهم علىه ومكانش بيتكلف ربع تكلفة المطاعم برة غير انه Home made!:D

بالنسبة للتوهان أنا معنديش مشكلة لأن طول ما أنا ماشي برسم خرايط في دماغي فبعرف أرجع ازاي تاني، ممكن لو حد عايز يجرب حاجة زي كدا يبقى يسأل المكان اللي نازل فيه يكتبله ورقة فيها العنوان بالصيني عشان الظروف.

اقرأ إيضا