بسمة محمود تكتب رحلتها إلى ماليزيا: 4 مدن في 8 أيام

بسمة محمود تكتب رحلتها إلى ماليزيا: 4 مدن في 8 أيام

Icon يناير 12, 2017
Icon By Ahmed Belal
Icon 0 comments

رحلة- بسمة محمود:

هتكلم دلوقتي عن رحلتي لماليزيا ??❤ (كوالا وملاكا وكاميرون ولانكاوي) في 8 أيام. وصلت كوالامبور (مطار KLIA2) الساعة 12 الظهر. سحبت فلوس من (ATM) ونزلت (level 2) في المطار أخدت باص لوسط البلد (KL Sentral) بياخد ساعه بـ 11 رينجت.

كنت حاجزة هوستيل (كان اول تجربة ليا إني أقعد في هوستيل، ونظامه مكنتش متقبلاه قوي، التواليت المشترك ده كان بالنسبة لي أزمة كبيرة) بس عادي أخدت على الجو، لأن الصراحة الهوستيل كان مكانه حلو جدًا، خمس دقايق مشي من المحطة KL Sentral.

الهوستيل اسمه pods-the-backpackers بـ 30 رينجت في اليوم بالفطار كمان (الفطار من 6 لـ 10 الصبح)، وصلت الهوستيل الساعه 1 تقريبا، سبت الشنط و نزلت اكتشف البلد اللي انبهرت بيها جدًا، أكتر من تايلاند بكتير، و ابدأ يومي الأول في كوالامبور.

تحت الهوستيل فيه سوبر ماركت صغير كده ومحل موبايلات (الراجل بيحب المصريين جدًا وبيتكلم عربي كمان) جبت من عنده خط تيلفون بالنت ب 20 رينجت ( النت خلص مني على نص المدة كده، وشحنته تاني بـ 20 رينجت).

معلومه كده على السريع: محطة (KL Sentral) مش مجرد محطة عادية، دي محطة زي الشهداء عندنا كده، فيها تبديل كل خطوط المترو، غير كده دي محطة جوه مول كبير، مول فيه محلات كتير ولبس وأكل وكل حاجة.

-رجعت محطة (KL) اخدت المترو لمحطة (Bukit bintang) ب 2.5 رينجت اول لما بتنزل من المحطة بتعدي الشارع بتلاقي شارع العرب دة شارع طويل اووي و كله محلات لبس و ساعات و شنط و كل حاجه تتخيلوها (دة لمحبي الشوبينج )

لفيت شوية ورجعت المحطة تاني أخدت المترو لمحطة (Masjid Jamek) بـ 1.20 رينجت، بتمشي شويه بتلاقي ميدان كبير قوي، فيه جوامع ومتحف وحاجات تانيو كتيير، خلصت اللفة بتاعتي كانت الساعه 6 تقربيا وجعانة جدًا، رجعت محطة (KL) ونزلت الدور الأرضي في المول بتاع المحطة، فيه سوبر ماركت كبير قوي زي كارفور عندنا اسمه SAM’S GROCERIA فيه أكل كتير، أغلى وجبة اللي هي سي فود وسلطات وعصير كمان بـ 15 رينجت وفيه من أول 10 رينجت كمان.

بعدين ركبت المترو لمحطة (KLCC) بـ 2.30 رينجت، قعدت في حديقة هناك واتفرجت على النافورة الراقصة وكانت تحفة ورحت على الهوستيل على 8 بالليل كده.

تاني يوم فطرت ونزلت على المحطة اخدت باص لـ Genting Highlands بـ 10.20 رينحت رايح جاي بالتلفريك كمان الساعه 11 الصبح الطريق ساعة ووصلت 12.

نصيحة: خلوا بالكم يكون فرق حوالي من 3 لـ 4 ساعات بين الباص رايح وراجع واحجزوا راجع علشان ساعات بيخلص ومش بتلاقوا راجع غير أماكن تانية مش (KL sentral) بعيدة عن وسط البلد.

معلومة: لما تنزل من التلفريك هتلاقي مول كده في ملاهي أطفال حلوة (فيديو جيم وبلياردو بقى وكده) وأكل برضه.

رجعت وسط البلد 4 العصر، نزلت اتمشى بالليل لقيت باص كده لونه بينك، ده ببلاش بيلف كل الأماكن السياحية (بتنزل في أي حته عايزها ولما تحب تكمل اللفه تستني الباص اللي بعده وتاخده وتكمل لفتك عادي)، رحت أماكن كتير بيه وبعدين أخدت المترو لحد محطة TBS بـ2.40 رينجت، وحجزت باص لملاكا الصبح بـ10 رينجت وحجزت كاميرون لبعدها بيومين بـ 35 رينجت وبعدين روحت.

الصبح بدري ركبت الباص لملاكا وصلت في ساعتين تقريبا، كانت الساعه 10 ونص كده وأخدت تاكسي للهوستيل اللي كنت حاجزه بـ 20 رينجت. وصلت الهوستيل كان حلو جدًا ومكانه رائع اسمه The Riverside بـ 25 رينجت في اليوم.

ملاكا بلد تتلف كلها على رجلك، نزلت اتمشيت شفت متاحف وحاجات كتيير كلهم في ميدان كبير كده، وفيه عجل هناك على شكل ديزني كده تحفة (لو حد حابب يركبها ب 25 رينجت) بتلف بيك البلد، بس هي أصلا مش مستاهلة، ممكن تتلف مشي.

فيه شارع هناك اسمه Jonker Street كله أكل حلو جدًا، ممكن تقعد 5 ساعات تجرب كل الأكل بس دة لمحبي الأكل كده زي متوسط أي حاجة هناك 3 رينجت.

و جمب Christ Church شارع بتجيب منه هدايا من المدينة متوسط السعر 5 رينجت وفيه حاجات هاند ميد حلوة قوي، متوسط الأسعار 20 رينجت.

تاني يوم في ملاكا دة كان استجمام بس تمشية وركبت مركب في النهر هناك بـ21.20 رينجت بيلف بيك البلد كلها بياخد حوالي ساعه ونص.

الصبح رجعت تاني كوالا ونفس الهوستيل برضه، نزلت أخدت المترو لمحطة Batu Cave بـ 2.60 رينجت ورحت تاني البرجين (محطة KLCC) لأنهم بيفرقوا الصبح عن بالليل في الشكل خالص.

وبعدين رحت بالمترو لمحطة (Pasar seni) جمبها شارع (Chinatown) فيه كل حاجة ممكن تحتاجها من لبس وشنط وهدايا وكل حاجة، وأسعاره حلوة، بس فاصلوا كتير، جبت هدايا (متوسط أسعار الهدايا هناك لو حاجات بسيطة كتذكار 10 رينجت).

وبعدها (Center) فيه حاجات كتير هاند ميد شنط وديكورات وكده وجنبه شارع طويل فيه فاكهة كتير وأكل حلو وبعدين رجعت الهوستيل تاني.

معلومة كده: ملاكا من أجمل المدن اللي زرتها ونفسي أعيش فيها جدًا، البلد كلها حوالين النهر والناس بتصحى الصبح تتمشى جنبه أو تركب عجل وكافيهات حوالين الميه، البلد كلها ألوان وكل البيوت مرسوم عليها، البلد كلها مبهجة بمعنى الكلمة، ده غير المزيكا اللي في كل مكان، والناس هناك حلوة قوي، في ناس وقفتني هناك اتعرفت عليا واتصورت معايا وعزموا علي بأكل كمان.

اقتراح: لو حابين تقضو يوم في (Sunway lagoon) التيكت كانت بـ 45 أطفال و55 كبار بس معرفش دة سعر العيد ولا هو كده على طول، لأني روحت في العيد.

الصبح خدت باص لكاميرون الساعه 8 الصبح بـ 35 رينجت بياخد حوالي 4 ساعات، وصلت 12 الظهر (ممنوع الأكل في الباص بتاع كاميرون، ميه بس)، وصلت هناك، كنت حاجزة فندق (هو غالي شويه بس قريب جدا من المحطة) بـ 130 رينجت اسمه (Meiko Hotel) نزلت جنب الفندق كشك سياحي كده، أخدت رحلة بتلف فيها كل المزارع بـ 25 رينجت الساعه 2 الظهر.

طلعت الفندق ريحت من الطريق ونزلت على ميعاد الرحلة، رحنا مزارع الفراولة وهناك في فراولة ومنتجاتها حلوة جدًا، أحلى فراولة ممكن تاكلها في حياتك، متوسط الأسعار 10 رينجت. وبعدين مزارع الشاي، بتنزل المزرعة بـ 2 رينجت تقريبا وبعدين رحنا شلالات كده تحفة.

تاني يوم عملت (Hiking) بتجيبه من كشك برضه بـ 35 رينجت تقريبا، بتتطلع الجبل بقي وتسلق حلو جدًا، بس خدوا لبس تقيل شوية مش صيفي يعني، أو خد شال معاك وكوتشي مريح وناشف من تحت.

الصبح بقي حجزت باص لبينانج بـ 37 رينجت الساعه 8 الصبح واتعرفت على واحده في الباص فغيرت الخطة كلها ونزلنا من الباص الساعه 11 الظهر كان معاها ناس مستنياها وصلونا الميناء علشان نروح لانكاوي ومن هناك أخدنا عباره بـ 32 رينجت قعدت 3 ساعات تقريبًا ووصلنا لانكاوي.

معلومة: معرفش نركب للميناء إزاي ولا بكام علشان رحنا بعربية.

أخدنا هوستيل هناك اسمه (P Motel Langkawi) بـ 50 رينجت مكانه حلو ومش بعيد عن البلد، ريحنا علشان المشوار ونزلنا، في قعدة على كافيهات في الشاطئ هناك وفيه شارع موازي ليه فيه لبس وحاجات لو عايزين هدايا من البلد وجنبنا هدايا متوسط الأسعار 15 رينجت. الأكل هناك غالي شوية ممكن الوجبه بـ 20 رينجت تقريبا.

تاني يوم روحنا التلفريك بـ 15 رينجت، حجزنا وكان لسه فاضل عليه ساعتين تقريبا روحنا الشلالات والمنظر تحفة. وبعدين رحنا التلفريك وكان أحلى كتير من Genting وطلعنا الجسر الهوائي اللي في السماء واتغدينا فوق بـ 23 رينجت وبعدين نزلنا وقضينا باقي اليوم تمشية.

الصبح أخدت طياره لبانكوك (مطار Suvarnabhumi) وبعدين أخدت برضه Shuttle bus لمطار muang amari don ببلاش ومن هناك أخدت طيارتي لمصر بقى وكده خلصت الرحلة للأسف في انتظار تكملة حلمي (50 دولة).

اقرأ إيضا