3 حالات للحصول على تأشيرة تركيا: انت أي حالة فيهم؟

3 حالات للحصول على تأشيرة تركيا: انت أي حالة فيهم؟

Icon يناير 9, 2017
Icon By Ahmed Belal
Icon 0 comments

تجربة- بهاء فاروق:

الحالة الأولى: سنك أقل من 20 سنة أو أكتر من 45 سنة, أو معاك فيزا شنجن أو أمريكا صالحة, يبقى هتعمل الفيزا أون لاين من الموقع ده https://www.evisa.gov.tr/en, ودي سعرها 20 دولار فقط بتدفعها بالفيزا أو الماستر كارد, بس خلي بالك لازم تكون حاجز تذكرة على أحد الخطوط دي:Turkish Airlines, Pegasus Airlines, Onur Air or Egypt Air, ويكون معاك حجز فندق خلال فترة إقامتك في تركيا, وباسبورك صالح على الأقل 6 شهور, بتعمل الخطوات بكل سهولة من على الموقع وبتجيلك الفيزا على الإيميل خلال دقيقتين تطبعها وكده احنا خلصنا 😀

الحالة التانية: لو مكتوب في باسبورك مهنة يبقى هتعمل فيزا سياحية من السفارة التركية وخطواتها كالتالي:

– الأوراق المطلوبة (جواز سفر ساري المفعول وصالح أقل شيء 6 شهور، كشف حساب بنكي على آخر 6 شهور فيه مبلغ مش أقل من 10.000 جنيه ويكون عليه عمليات سحب وإيداع كويسة. لو في حالة إنك قاصر أو كنتي بنت غير متزوجة ينفع حساب الوالد أو الوالدة أو دفتر توفير أو أي إثبات أملاك, خطاب من العمل. ولو انت طالب أو طالبة بتجيب شهادة قيد من الجامعة، حجز طيران وفندق مبدئي، تأمين طبي وده بيتعمل في مصر للتأمين مثلا أو أي مكتب تأمين، صورتين شخصيتين 4*6.

– خطوات التقديم على الفيزا من خلال الموقع الرسمي للسفارة من هنا: https://goo.gl/7W2CWZ

هتعمل سكان لكل الأوراق على الموقع وتكمل الخطوات أون لاين وتاخد ميعاد علشان تروح تقدم فى السفارة والإستلام بيكون بعد 3 أيام عمل.

– بعد ما هتحدد الموعد هتروح السفاره سواء في القاهره أو الإسكندرية وتاخد كل الورق ده معاك تاني وتسلمه في السفارة وبعد 3 أيام عمل إن شاء الله تستلم الفيزا. ملحوظة: لازم ورقة الميعاد علشان تعرف تدخل السفارة.

الحالة الثالثة : لو أنت طالب أو مكتوب في باسبورك حاصل على، يبقى لازم تطلع فيزا زيارة مش سياحة، علشان تعرف تاخد تصريح أمني, وهي نفس الخطوات السابقه ولكن بتزيد على الأوراق المطلوبة: دعوة من شركة في تركيا والفيزا مش بتكون بغرض السياحه بتعملها زياره ودي ممكن تتعمل عن طريق بعض شركات السياحة في مصر.

كده احنا خلصنا الفيزا هنروح بقى علشان نعمل التصريح الأمني من مجمع التحرير.

التصريح الأمني:

أي حد سنه من 18 الى 40 سنة مهما كانت مهنته أو شهادته لازم يطلع تصريح أمني للسفر إلى تركيا بس ليها حالتين:

الحالة الأولى: لو مكتوب مهنة في جواز سفرك، تقدر تعمل فيزا سياحة أو زيارة أو عمل من سفارة تركيا.

الحالة الثانية: لو مكتوب في جواز سفرك طالب أو حاصل على, يبقى لازم تطلع فيزا زياره فقط للحصول على تصريح أمني.

طيب إجراءات التصريح الأمني إيه: تصور الفيزا والباسبور وتاخد معاك نص جنيه وتروح مجمع التحرير, الدور الأول, مكتب رقم 15 (مكتب ظابط الاتصال) وتقدم على التصريح وتستلمه إن شاء الله بعد 4 أيام تقريبا و بتكون صلاحيته شهرين من تاريخ الاستلام.

اقرأ إيضا