كريم منير يكتب رحلته لبانكوك: أسبوع في تايلاند أرخص من الساحل

كريم منير يكتب رحلته لبانكوك: أسبوع في تايلاند أرخص من الساحل

Icon ديسمبر 8, 2016
Icon By Ahmed Belal
Icon 0 comments

رحلة- كريم منير:

صباح الخير عليكم بتوقيت مصر، مساء الخير عليكم بتوقيت تايلاند. جاي لي أسئلة كتير من أصحاب ومن فولورز عن تفاصيل رحلتي لتايلاند وكلفتنني كام، بعتذر إني مقدرتش أرد على كل واحد لوحده لكن دي بعض التفاصيل اللي هاتفيدكم.

أنا مبسافرش مخصوص للمكان، أنا لما بكون مسافر شغل بشوف أقرب بلد وأنزلها كام يوم تغيير جو، لكن لو عايزين تفاصيل رحلة بسيطة لتايلاند فاتفضلوا (ملحوظة: الأسعار قبل التعويم):

تذكره طياره مصر للطيران 4650 جنيه رايح جاي (ممكن تجيبها أرخص بترانزيت لكن دي دايركت)،  إقامه في بوكيت (دي زي شرم الشيخ عندهم) جيست هاوس ده حاجه بين الهوسلز والأوتيلات يعني أوضه نضيفة شيك زي ما انتو شايفين، بحمام مستقل ورسبشن وخدمه تنضيف لكن الرسبشن مبيشتغلش ٢٤/٧ لا بتكلمهم وانت جاي وكده.

14237688_1540211946005039_121993602445789726_n

خدت ٤ ليالي بـ ٥٠٠ جنيه مصري يعني الليله بـ ١٢٥ جنيه في الأوتيل ده، وده ع الشارع الرئيسي وبينه وبين شاطئ باتونج ٤ دقايق مشي. لو هتاخد معاهم ٣ أيام في بتايا أو بانكوك هيكون بنفس السعر برضه.

الأكتيفيتي اللي طلعتها امبارح دي full day شامل جزيره قرود وركوب أفيال في شلالات ووتزحلق عالواير ورافتنج (ركوب مركب مطاطي في شلالات ٥ كم مع اتنين لايف جارد لكل مركب عليها ٤ أفراد) وغداء (رز وفراخ وشوربة وكافيه أو شاي)، وتزحلق عالواير وطلوع عشان تعوم في بحيرة الشلال الرئيسي مع السمك، وميكروباص مكيف بياخدك من تحت الأوتيل ويرجعك تاني وكل ده بدون ماحد بيطلب جنيه تيبس، غير اللايف جارد بتوع الرافتينح واديتهم عشان نزلت أعوم في الشلال بدون جاكت ولا خوذة، الرحلة كلها بـ ٣٠٠ جنيه مصري، اه وربنا.

14183674_1540211916005042_1963190528789792928_n

لو انت شايف إن طيران وإقامه لفرد واحد بس أقل من ٦ آلاف جنيه في ١٠ أيام بـ ٨ ليالي (يوم رايح وزيه راجع بره السفرية)، ولو طلعت مع صاحبك هاتوفروا كتير في الأكل والانتقالات والإقامة. فانت غلطان لو لسه بتروح الساحل تدفع في أسبوع أكتر من 10 آلاف جنيه عشان تشوف نفس المناظر وتقف في طوابير شواطيء، وتدخل الشط بـ ٣٠٠ جنيه غير الأكل والحبشتكنات عشان تقعد مع نفس الناس اللي هاتقابلهم عادي كل يوم في الكافيهات.

صحيح الشعب التايلاندي ودود جدًا واللي يقولك بألف قوله بـ ١٠٠ وهتخلص على ١٠٠ برضه لو صممت. إيجار يوم الاسكوتر 24 ساعة بـ ٥٠ جنيه تلف بيه البلد كلها، بعد الأسعار دي والمعاملة دي عرفتو السياح طفشو من شرم الشيخ وراحو فين.

أحلى رقم تسافرو مع بعض ٣ بالكتير عشان اختلاف المجهود والطاقة هيخلي في ناس تلف كتير ومتنامش زيي وناس تحب الأنتخة، لكن ٣ أفراد هيشيلو بعض وتقدروا تاخدو غرفه تريبل توفر كتير.

14238371_1540212089338358_1999559556204293182_n

التأشيره رسمي بـ ٣٠٠ جنيه بتطلع في 4 أيام وكشف حساب فيه ١٠ آلاف جنيه وخطاب جهة عمل أو سجل تجاري. عملتها (البات) الاتنين بجنيه. كل حاجه هنا رخيصة وفاصل كويس والسوبر ماركت والأسواق مليانين كل حاجه بس لو بتاكل جبنة ع الفطار أو العشا هات معاك، هنا ميعرفوهاش.

لكن الميه والعصاير بنفس السعر والفاكهة وهمية وفيها فصال كتير، صدقني السفرية تستاهل وأحسن من تغيير الموبايل وشراء حاجات ملهاش لزمة، وفي حاجات لو معملتهاش وانت صغير مش هتلاقي صحة ومزاج تعملهم لما تكبر.

طلع في دماغي آكل سمك وأنا راجع من البحر، دخلت المطعم البسيط ده طلبت سمكاية كانت عايزة تديهالي متلجة، لكن على مين، خدت واحدة صاحية من البوكس عملت كيلو إلا ربع ومعاها بتاع كيلو إلا ربع، السمكة اتسوت صرمبيء سنجاري تايلاندي، وبتجيلك في طبق تحته فحم وحواليها شوربة خرافية، أنا اللي نقيت طريقة التسوية من المنيو والصرمبيئ اتعمل ع البخار عشان يكون صحي بس مستحملتش طعمه فطلبت ليمون زيادة. حساب الحاجات دي بالعمايل والخدمة والرز وطبق فاكهة صغير هديه بعد الأكل (كانو نزلوا بيرة بس أنا مبشربش) فجابوا لي فاكهة، الحساب ١٢٥ جنيه مصري، كلمني عن آخر أكلة سمك نضيف دفعت فيها كام. 😀

14232407_1540212029338364_346898225039569924_n

لو بتحب تركب براشوت فوق البحر وركبته في شرم أو الغردقه أحب أقولك إنه هنا مختلف شوية، لأنك بتطير من على الشط مش من وسط البحر فوق مركب، والهواء هنا قوي جدًا ف في واحد لايف جارد بيركب معاك فوق حبال البراشوت يعمل بالانس ويتحكم فيه، وانت مبتحسش بيه اللفه حوالي ٧ دقايق بيقولك بـ ١٥٠٠ باط وتفاصل، أنا خدتها بـ ٨٠٠.

بوكيت بلد سياحية جدًا زي شرم الشيخ تقريبًا، وتبعد عن العاصمة بانكوك بتاع ٦٠٠ كم، فلو انت هاتخلص بوكيت وتروح بانكوك أو بتايا قدامك حلين أتوبيس مباشر من بوكيت بسعر ١٦٠٠ بات، بس بياخذها في ١٥ لـ ١٦ ساعة، وهو ميعاد واحد بيطلع ٤ العصر يوصل ٨ الصبح تاني يوم أو تدخل sky scanner تدور علي رحلة، وواضح قدامكم هنا سعرها ٤٠٠ جنيه يعني برضه ١٦٠٠ بات وتاخدها في ساعه ونص وميني باص للمطار بـ ٢٠٠ بات ياخدك من باب الأوتيل زي أي تاكسي تحجزه من أي شركة رحلات هناك.. بس كده. 😀

14238371_1540212089338358_1999559556204293182_n